A Estrada, 23 de xullo. José Antonio Dono, alcalde da Estrada, visitou esta mañá a antiga Casa-Escola de Santa Cristina de Vea, que  foi reformada recentemente polo Obradoiro de Emprego A Estrada VII. Nesta visita estivo acompañado polos alumnos, profesores e equipo directivo deste proxecto formativo.
 
A reforma executada supuxo a construción dunha nova cuberta, a base de planchas de fibrocemento e tella curva do país, para substituír á anterior, moi deteriorada. Tamén instalaron canalizacións de recollida das augas pluviais. Ademais, instaláronse novas fiestras e persianas en varios tramos do edificio nos que era preciso anovalas. No exterior, deuse un novo revocado ás fachadas, que tamén foron pintadas, para mellorar o seu aspecto e protexelas da humidade.
 
A reforma incluíu melloras na accesibilidade dos usuarios, coa construción de ramplas de acceso ao edificio, e a adaptación dos aseos para a súa utilización por parte de persoas con mobilidade reducida. Tamén se fixo unha nova canalización das augas residuais.
 
Para o interior do edificio, os alumnos do módulo de carpintería realizaron distintos mobles e marcos de fotos cos que se decoraron as estancias da escola. Os alumnos do Obradoiro tamén construíron e instalaron un biombo móbil, que permite separar a sala única da planta baixa da escola en dous ámbitos diferenciados. A reforma incluíu, por último, a execución dunha nova chimenea.
 
Os veciños de Santa Cristina participarán hoxe, a partires das 22:00 horas, nun acto de inauguración deste centro veciñal Acto ao que estan convidados todo o persoal directivo, docente e alumnado do Obradoiro así como os veciños de Santa Cristina.